🌹 *अजून मिळते का ?* 🌹
             *- महेश मोरे ( स्वच्छंदी)*

वेदना भरभरून मिळते का ? 
सोसल्याने अजून मिळते का ?

शोधण्यातच गड्या दिवस जातो
दु:ख केवळ बसून मिळते का ?

सूर जुळल्यामुळेच तर मिळते
प्रेम 'मिळते म्हणून' मिळते का ?

वेळ मिळताच घ्यायचे असते
एक चुंबन शिकून मिळते का ?

वर्तनाचा सुवास दरवळतो
नाव केवळ झिजून मिळते का ?

प्रेमभंगात फाटले आहे
हृदय कोठे शिवून मिळते का ?

काळजावर लिहून जे मिळते
कागदावर लिहून मिळते का ?