🌹 *लागला मृदुगंध जेव्हा दरवळू* 🌹
                           *- स्वच्छंदी*


लागला मज अर्थ जगण्याचा कळू
लागला मृदुगंध जेव्हा दरवळू


ये पुन्हा भेटू नव्याने एकदा
ये पुन्हा मिसळून जाऊ..विरघळू

सांग तू आता तरी इच्छा तुझी
या जगासाठीच कुठवर मी ढळू ?

बोललो मी बस् तुझ्याबद्दल जरा
लागल्या जखमा जुन्या मग भळभळू

आठवण आली तिची की लागतो
एक अश्रू कारणाविन ओघळू

रात्र ही ठरवून हाका मारते
सूर्य हा ठरवून म्हणतो मावळू

लागला जर का सुगावा 'त्या' तिचा
लागतो हा श्वास मागे घुटमळू