गझल........
            - स्वच्छंदी

शोषकांनी शोषिलेले शोषितांचे रक्त आहे
हे गुलामांच्या मढ्यांवर बांधलेले तख्त आहे

दावणीला बांधलेली शोषितांची जिंदगानी
आज त्याची रोख किंमत एक भाकर फक्त आहे

कोण करतो सांग हल्ली शोषितांची काळजी
देवसुद्धा वाटते त्या शोषकांचा भक्त आहे

काल त्यांनी बंद केली बोलणारी चार तोंडे
आजही त्यांचा पहारा भोवताली सख्त आहे

आजवरती शोषिताला ना दिले बोलून कोणी
वेदना त्याच्या मनाची आजही अव्यक्त आहे