🌹 *ठरलेली* 🌹
            *- महेश मोरे (स्वच्छंदी)*

सुख-दु:खांची टक्केवारी ठरलेली
आयुष्याची दुकानदारी ठरलेली

मित्र नि शत्रू, अपुले-परके ठरलेले
ज्याची त्याची हिस्सेदारी ठरलेली

खरे पुरावे किती जरी सादर केले
निकालामधे तिची हुशारी ठरलेली

व्यापांमध्ये आठवडा तर जातो पण
तिची आठवण दर रविवारी ठरलेली

जन्म मुलीला देऊ शकलो नाही तर
आयुष्यावर एक उधारी ठरलेली

शिकलो नाही तर जन्माचे वाटोळे
अन् शिकल्यावर ही बेकारी ठरलेली

शक्ती-बुद्धी दोघी बहिणी नशिबाच्या
एक भिकारी एक जुगारी ठरलेली