🌹गझल🌹
-----------------------------------------
              *नक्की*
                   *- स्वच्छंदी*
-----------------------------------------
तिचे वेगळे बेत आहेत नक्की
तसे स्पष्ट संकेत आहेेत नक्की

खुळ्यासारखे हासतो मात्र अमुची
मने हुंदके देत आहेत नक्की

कशी हेलकावून जातेय होडी
कुणी गुंड नावेत आहेत नक्की

तसे भोवताली कळीच्याच काटे
तिची काळजी घेत आहेत नक्की

जगाया शिकावे असे ज्यात नाही
धडे तेच शाळेत आहेत नक्की

गझल वाचताना तिची याद यावी
असे शेर गझलेत आहेत नक्की

किती चाललो पण मला हे कळेना
कुठे पावले नेत आहेत नक्की ?