हुंदका बोलून जातो
                   - स्वच्छंदी

मान वळते,चेहरा झाकून जातो
पण प्रियेचा हुंदका बोलून जातो

आसवांचा बांध फुटतो पापणीतच
आठवांचा गाव ओलावून जातो

काळजाच्या आत थरथर होत गेली
पैंजणांचा नाद हे सांगून जातो

लाजणारा चेहरा कोठून आणू
आरशाला मीच समजावून जातो

याद येते का तिलाही रोज माझी
ऊचक्यांनी जीव भंडावून जातो

कोणता संकेत देते जिंदगानी
भारलेला मोगरा वाळून जातो

रातराणी मोगऱ्याला साद देता
काळजाचा घाव भेगाळून जातो