गझल........
 उंबऱ्याचे माप ओलांडून जाते
                        - स्वच्छंदी

उंबऱ्याचे माप ओलांडून जाते
पोर भलती काळजी लावून जाते

बोलते अन् हासते सवयीप्रमाणे
एक मोठा हुंदका देऊन जाते

पाय घेतो आजही माघार तेव्हा
मात्र अलगद मान ती वळवून जाते

हात 'तो' हातात येता धूंद होते
बापड्याचा हात मग सोडून जाते

लपवितो मी ओंजळीतच आसवे पण
पापण्यांची कोर ओलावून जाते

लागतो गंधार ओल्या आठवांचा
काळजाची तार ती छेडून जाते

पोरगी चतकोर असते काळजाची
जिंदगीचा डोह हेलावून जाते