गझल......
 चतकोर भाकर
         - स्वच्छंदी

पोर बांधूनी खुटीला मागते चतकोर भाकर
जिंदगानीच्या व्यथा मग सांगते चतकोर भाकर

जाणतो प्रत्येक प्राणी सूत्र हे सत्यातले की
झोपतो श्रीमंत तेव्हा जागते चतकोर भाकर

आतड्यांना पीळ पडता जीव हा कंठात येतो
दुश्मनांच्या सारखी का वागते चतकोर भाकर

भाकरीची टोपली बघ काल ज्या हातांत होती
आज त्यांच्या जिंदगीला भागते चतकोर भाकर

रोख रक्कम, खानदानी बंगले,गाडी कशाला
झोप घ्यायाला नशीबी लागते चतकोर भाकर