तेव्हापासून.........!
              - स्वच्छंदी

तू मला हेटाळले ........तेव्हापासून
मी मला सांभाळले .....तेव्हापासून

स्तब्ध झाली आसवे डोळ्यांमधली
स्वप्न मी चुरगाळले ......तेव्हापासून

बोलणे होते कुठे हल्ली अपुले
भेटणे तू टाळले .........तेव्हापासून

यातनांना रोज देतो आमंत्रण
दु:ख 'ते' रक्ताळले .....तेव्हापासून

साथ माझी सोडली स्वप्नांनीही
अन् ह्रदय भेगाळले.......तेव्हापासून

मी न माझ्या लागलो बघ हाताला
मन तुझ्यावर भाळले ...तेव्हापासून

मंद झाला काळजाचा ठोकाही
मी तुला कवटाळले ....तेव्हापासून