🌹 *कळला नाही काटा* 🌹
               *- महेश मोरे (स्वच्छंदी)*

हृदयामध्ये कधी कुणाच्या घुसला नाही काटा
फुले टोचली जितकी 'तितका' सलला नाही काटा

फुलास टोचत होता काटा..हे दुनियेला कळले
'वाचवणारा' फुलास कोणा कळला नाही काटा

स्वत: होवुनी कधी कुणाशी मस्ती नाही केली
फक्त टोचला त्याला...ज्याला दिसला नाही काटा

फुले मिळाली, फळे मिळाली झाडाला नशिबाने
पण झाडाच्या नशिबामधला चुकला नाही काटा

काट्यासोबत फुले राहिली..टोचाया शिकली पण
फुलांबरोबर राहूनसुद्धा फुलला नाही काटा

प्रेम एकदा त्याने केले फुलावरी 'इतके' की
फुलास सलण्याइतकासुद्धा उरला नाही काटा

वेळप्रसंगी कुजून गेला, जळूनसुद्धा गेला
पण कोणाच्या पुढे कधीही झुकला नाही काटा