वृत्त... *गंधप्रिया*
           

लगावली  : गालगागा गालगागा गाललगा

🌹 *काय करू ?* 🌹
                 *- महेश मोरे (स्वच्छंदी)*

'त्या' गुलाबाच्या मिठ्यांचे काय करू ?
'त्या' मिठीमधल्या क्षणांचे काय करू ?

हुंदका आहे विचारत रोज मला
जीवघेण्या आठवांचे काय करू ?

आत लपवू की रचू त्यातून गझल
तू दिलेल्या वेदनांचे काय करू ?

हात हाती घेत असता काल मला
लागलेल्या अत्तरांचे काय करू ?

जी फुले फुलली..उधळली, मान्य जरी
सांग फुलणाऱ्या कळ्यांचे काय करू ?

आपले नव्हतेच केले दूर तयां
आपले आहेत त्यांचे काय करू ?

चेहऱ्यावरचे लपवले सर्व चरे
काळजावरच्या व्रणांचे काय करू ?

आवडू जर लागले तुज हारतुरे
मी जमवलेल्या फुलांचे काय करू ?

पापण्या मिटतीलसुद्धा ऐन क्षणी
पापणीभर आसवांचे काय करू ?

मुखवटा तर घेतला बदलून प्रिये
आतमधल्या भावनांचे काय करू

तू भले झाकून घेशिल देह तुझा
माणसांतिल रावणांचे काय करू ?