🌹 *उरात शिल्लक आहे* 🌹
                    *- महेश मोरे (स्वच्छंदी)*


छबी गुलाबी फुलासारखी मनात शिल्लक आहे
तिची आठवण बनून धडधड उरात शिल्लक आहे


सुकून गेल्या फुलाप्रमाणे निघून गेली ती पण
तिचाच दरवळ तिने दिलेल्या फुलात शिल्लक आहे

अफाट थंडी असेल पडली बघायला 'हे' केवळ
किती धगाटा अजून इथल्या उन्हात शिल्लक आहे

धुक्यात जेव्हा पुन्हा हरवलो..कळून चुकले 'हे' की
स्पर्श प्रियेचा अजून ओल्या दवात शिल्लक आहे

कसा म्हणू 'तो' निघून गेला निघून गेल्यावरही
गझल व्यथांची लिहून जो ह्या जगात शिल्लक आहे.