जुन्या आठवणी......... ........जशा आठवतील तशा *बैलगाडीचा साठा* दिस ढळाया निघता आलं दारी गिऱ्हाईक, म्हणे लाकूड कुजकं तरी जळणाला ठीक. खत, जळण, वैरण उभं शिवार वाहिलं, धन्यासोबती चांगलं दिस वंगाळ पाहिलं. साठा बैलांच्या गाडीचा असा मोडून पडला, बैलं दावणीची गेली तेव्हा म्हातारा रडला. गोड चाबकाची साद, आणि नांगराची गाणी, अंगा धोतर फाटकं ओठी शीळ मंजुळवाणी अशी शिरमंती शिवारा दरपावलात व्हती, डोई आभाळबी व्हतं अन् पायाखाली माती. लोक जिमिनीव होते, दर मालाला नव्हता, तरी कष्टाच्या घामाला वास आनंदाचा व्हता. धनी राजावानी भासे दिसें रथ बैलगाडी, राणी शोभे मालकीण जवा नेसे नवी साडी अशा किती आठवणी गोड साठ्यात साठल्या, आज त्याच्या लाकडांनी चुली दारात पेटल्या. सारं बदललं बाबा बदलली जुनी गाणी, खोल काळजात आता नुस्त्या जुन्या आठवणी. ...................... *स्वच्छंदी*

सकाळ ......................................... सुखांच्या शालीखाली वेदनेला झाकायचं, सारंकाही विसरून पाऊल पुढे पुढे टाकायचं. चढ उतार काय येतच असतात आयुष्यात आपलीही आठवण रहावी इतरांच्या भविष्यात मजाकमजाकमध्येसुद्धा नेहमी हसत जगावं, आनंदाच्या वाटेवरती आयुष्याचं गाणं व्हावं. नव्या दिवसाच्या गळ्यात घालावी नव्या जगाची माळ, काळाच्याआधी अनुभवावी नवी नवेली सकाळ.......... ..............स्वच्छंदी महेश